အနော်ရထာ လမ်းမကြီးဟာ ညနေစောင်းပြီ ဆိုတာနဲ့ ‘ဘဝရင်ကွဲ’ တွေနဲ့ ပြည့်နှက်နေတော့တာပါပဲ။ လမ်းဘေး ဈေးသည်တွေနဲ့ပလက်ဖောင်း အခင်းအကျင်း အလုပ် အသီးသီးကနေ အိမ်ပြန်ကြမယ့် လူတွေနဲ့ ပြည့်နှက်နေတဲ့ ကားမှတ်တိုင်၊ မြစ်တစ်စင်းလို
တသွင်သွင် စီးဆင်းနေတဲ့ ကားရေစီးကြောင်းကြီး စသဖြင့် လူသံ၊ ကားသံ၊ ဈေးခေါ်သံတွေနဲ့ ဆူညံပွက်နေခဲ့တော့တယ်။
လမ်းဘေးဈေးတန်းကြီးဟာ ပစ္စည်းမျိုးစုံ၊ ဒီဇိုင်းမျိုးစုံနဲ့ အတော့်ကို ရှည်လျားလို့ နေပါပြီ။ အဲဒီထဲမှာတော့ နိင်ငံခြားက တင်သွင်းလာတဲ့ ‘လေဘေးထည်’ တွေကတော့ ရောင်းအကောင်းဆုံးပါပဲ။
ဈေးမေးတဲ့ သူကမေး၊ အဆင်ရွေးတဲ့ သူကရွေးနဲ့ လူအုပ်ကြီးဟာ အထည်တွေပေါ် ပြိုလဲကျလုမတတ် ယိမ်းထိုးနေပါတယ်။ အဲဒီလူအုပ်ထဲမှာ ထမင်းချိုင့်ကိုယ်စီနဲ့ လူနှစ်ယောက်လည်း အပါအဝင်ပေါ့။ တစ်ယောက်က ကျကျနန ထိုင်ပြီး အဆင်တွေ၊ အရောင်
တွေကို စိတ်တိုင်းကျ ရွေးချယ်နေပါတယ်။ နောက်တစ်ယောက်ကတော့ နာရီ တကြည့်ကြည့်နဲ့ အိမ်ပြန်ဖို့ စိတ်စောနေပုံပါပဲ။
‘နေပါဦး ငါ့ညီရာ၊ အကိုကြီး ရွေးပါရစေဦး’
‘အချိန်မရှိတော့ဘူး အကိုကြီးရ၊ လိုင်းကားမမှီဘဲ နေလိမ့်မယ်’
ဒီလိုနဲ့ သူတို့နှစ်ဦးဟာ သုံးလေးကြိမ်လောက် ငြင်းခုံကြပြီးတဲ့နောက်မှာတော့ အကိုကြီးလုပ်သူဟာ အင်္ကျီတစ်ထည်ကို ရွေးချယ်လို့ပြီးသွားပါတယ်။
‘ဘယ်လိုလဲ ငါ့ညီရ၊ အကို ရွေးထားတာ လှတယ် မဟုပ်လား’
‘လုပ်မနေနဲ့ အကိုကြီးရာ၊ ကျွန်တော်တို့ ရွေးချယ်နိင်တာက အဆင်နဲ့ အရောင်ပါပဲ။ ကျွန်တော်တို့ ရွေးချယ်ခွင့် မရဘဲ ရွေးချယ်ခဲ့ရတာကတော့ အားလုံး လေဘေးထည်တွေချည်း ပါပဲဗျာ’
သေချာတာက အဲဒီနေ့က သူတို့ နှစ်ယောက် အိမ်ပြန်နောက်ကျ ခဲ့ကြပါသည်။
---------------------------------------------------------------------။-------------------------------------------------------------------
ဒီနိုဗို
အမှတ် ၅၀ ၊ ၁၉၉၉ ချယ်ရီ မဂ္ဂဇင်း
မှတ်ချက်။ ။ ထိုအချိန်က ‘ပန်းပျိုးလက်’ ကလောင်နာမည်ဖြင့် ရေးသားခဲ့ပါသည်။
No comments:
Post a Comment