အနီရောင် မှတ်စုစာအုပ် (၂)

နောက်တစ်နှစ်ဖြစ်တဲ့ ၁၉၇၃ မှာတော့ ကျွန်တော်ဟာ ပြင်သစ်တောင်ပိုင်းက ယာခင်းတစ်ခုမှာ ယာခင်းစောင့်အလုပ်ရတယ်။ ကျွန်တော့်မိတ်ဆွေရဲ့ အမှုကိစ္စကတော့ သူမ အနောက်မှာ ကျန်ရစ်ခဲ့ပါပြီ။ ကျွန်တော်တို့ရဲ့ တက်လိုက်ကျလိုက်ဖြစ်နေတဲ့ အလွမ်းဇတ်ရှိန်ကလည်း တစ်ဖန်ပြန်မြင့်လာခဲ့ပါပြီ။ ဒီလိုနဲ့ ကျွန်တော်တို့နှစ်ယောက်လည်း အဲဒီအလုပ်ကို လက်ခံလိုက်ကြတော့တယ်။ ကျွန်တော်တို့ နှစ်ယောက်လုံး မှာလည်း ချွတ်ခြုံကျနေတော့ကာ ဒီအလုပ်မှ မရယင်လည်း အမေရီကားသာ ပြန်ကြဖို့ရှိပါတော့တယ်။ နှစ်ယောက်လုံး ကလည်း အဲဒီ အချိန်မှာ ပြန်ဖို့ အသင့်ဖြစ်မနေကြသေးဘူး။

အဲဒီနှစ်ကတော့ အတော် စိတ်ဝင်စားဖို့ကောင်းတဲ့ နှစ်ပါပဲ။ တစ်ဖက်မှာ ယာခင်းရဲ့ ပတ်ဝန်းကျင်အနေအထားက သိပ်လှတယ်။ စပြစ်ခြံတွေနဲ့ စည်းခတ်ထားတဲ့ ဆယ့်ရှစ်ရာစု ခေတ် ကျောက်တုံးအိမ်ကြီးရယ် သူ့မျက်နှာခြင်းဆိုင်မှာ နိင်ငံပိုင် သစ်တောကြိုးဝိုင်း ကြီးရယ်၊ အနီးဆုံးရွာဆိုတာတောင် နှစ်ကီလိုလောက် ဝေးသေးတယ်။ ဒါပေမယ့် အဲဒီရွာမှာလည်း လူဦးရေက လေးဆယ်ထက်မပိုပါဘူး။ ပြီးတော့ ရွာသားတွေ အားလုံးက ခြောက်ဆယ် ခုနစ်ဆယ်အောက် တစ်ယောက်မှ မရှိဘူး။ ဆိုတော့ လူငယ် စာရေးဆရာနှစ်ယောက် အတွက် တစ်နှစ်လောက် စာကောင်းကောင်းရေးလို့ ရမယ့် တကယ့် နေရာကောင်းလေးပေါ့။ အယ် နဲ့ ကျွန်တော်လည်း အဲဒီမှာ အားသွန်ခွန်စိုက် ရေးလိုက်ကြတာ အတော့်ကို အလုပ်တွေ ပြီးကြတယ်။ ကျွန်တော်တို့ နှစ်ယောက်လုံး မှန်းထားတာထက်ကို ပို လုပ်နိင်ခဲ့ကြတယ်။ တစ်ဖက်မှာတော့ ကျွန်တော်တို့မှာ လုံးဝ ဥဿုံ ငတ်ပြတ်လုနီးနီးကို ကြုံရတယ်။ ကျွန်တော်တို့ရဲ့ အလုပ်ရှင်အမေရိကန် လင်မယားကတော့ ကျွန်တော်တို့အတွက် လစာလေး (ဒေါ်လာငါးဆယ်) ရယ်၊ ကားဓါတ်ငွေ့ ဖိုးရယ်၊ လာဘရေဒါ အမဲလိုက်ခွေးကြီးအတွက်(သူကလည်း အိမ်သားတစ်ယောက်ဖြစ်နေပါပြီ) ကျွေးမွေးစားရိတ်ရယ်ကို ပို့ပေးလေ့ရှိတယ်။ အားလုံးခြုံလိုက်ယင်တော့ ဒါဟာ အတော့ကို ရက်ရောတဲ့ အစီအစဉ်ပါပဲ။ ကျွန်တော်တို့မှာ ငှားခလည်း ပေးစရာမလို၊ လခနဲ့ မလောက်ငယင်တောင် ကြိုသုံးထားလို့ရ သေးတယ်။ ကျွန်တော်တို့ရဲ့ အစီအစဉ်ကတော့ ဘာသာပြန်လို့ရတဲ့ ဝင်ငွေကို တစ်ဖက်က စုမယ်ပေါ့။ ပဲရစ်ကနေထွက်မလာခင်လေးမှာ ကျွန်တော်တို့က တစ်နှစ်စာ ဘာသာပြန်အလုပ်အတော်များများကို လက်ခံလာခဲ့ကြပြီးပြီ။ ကျွန်တော်တို့ ထည့်မတွက်ခဲ့မိတာကတော့ ထုပ်ဝေသူတွေဟာ အမြဲလို ငွေရှင်းပေးတာ နောက်ကျ ကြတယ်ဆိုတာပဲ။ နောက်တစ်ခု ကျွန်တော်တို့ မေ့နေတာက တိုင်းပြည် တစ်ခုကနေ တစ်ခု ချက်လတ်မှတ်ပို့တဲ့ အခါ ရောက်ဖို့ ရက်သတ္တပါတ်နဲ့ ချီပြီးကြာတတ်တယ် ဆိုတာရယ်၊ ပြီးတော့ ရောက်လာပြန်တော့လည်း ဘဏ်ဝန်ဆောင်ခတွေရယ် ငွေလဲနှုန်းကွာဟချက်တွေရယ် ဖြတ်တောက်ပြီးမှ ပေးကြတယ်ဆိုတာပဲ။ အယ် နဲ့ ကျွန်တော့်မှာ ဘယ်လိုမှ မှားတွက်လို့မရ၊ အမှားခံလို့မရတဲ့ အနေအထားမှာ ဆိုတော့ကာ အတော့်ကို ဆိုးဆိုးရွားရွား ဘေးကျပ်နံကျပ် အခြေအနေမျိုးကို မကြာခဏ ကြုံကြရတယ်။

ကျွန်တော့်မှာ ရက်ရက်စက်စက် နီကိုတင်း ယင်းထတာ မှတ်မိသေးတယ်။ ကျွန်တော့်ခန္ဒာကိုယ် တစ်ခုလုံး ချင်ခြင်းတပ် ပြီး ဘာခံစားမှုမှ မရှိတော့၊ ကျွန်တော့်မှာ ဆိုဖာကူရှင်တွေကြား၊ ဗီရိုတွေရဲ့ နောက်ကြားထဲ အကြွေစေ့လေးများ ရှိမလား ကုပ်ကပ် ရှာဖွေနေခဲ့မိတယ်။ ဆယ့်ရှစ်ဆင်တိုင်း(သုံးဆင့်ခွဲ) လောက်နဲ့ Parisiennes တံဆိပ်နဲ့စီးကရက် ဝယ်သောက်လို့ရတယ်လေ။ တစ်ဘူးမှာ လေးလိပ်ပါတယ်။ ကျွန်တော့်မှာ ခွေးစာကျွေးရင်း သူတို့ကတောင် ကျွန်တော်တို့ထက် အခြေအနေ ကောင်းသေးတယ်လို့ တွေးမိတယ်။ ကျွန်တော့်မှာ တစ်ညနေ အယ်နဲ့ ခွေးစာဗူးကို ဖောက်ပြီး ညစာ လုပ်ကြဖို့ တိုင်ပင်ကြတာ မှတ်မိသေးတယ်။

အဲဒီနှစ်မှာ တစ်ခြား ဝင်ငွေဆိုလို့ ဂျိမ်းရှူးဂါး(James Sugar) ဆိုတဲ့ လူဆီက ရတာပဲ ရှိတယ်။ (ကျွန်တော်က ရူပကသဘော ဆောင်တဲ့ နာမည်တွေကို ငြင်းဆိုဖို့ မရည်ရွယ်ပါဘူး၊ တကယ်ဖြစ်တာက ဖြစ်တာပဲလေ၊ ကျွန်တော်လည်း ဘယ်လိုတက်နိင်မလဲ) ရှူးဂါးက National Geographic ရဲ့ ဓါတ်ပုံဆရာ တစ်ယောက်အနေနဲ့ အလုပ်လုပ်တယ်။ သူနဲ့ ပက်သက်ဖို့ဖြစ်လာတာက သူက ကျွန်တော်တို့ကို အလုပ်အပ်ထားတဲ့သူနဲ့ ဒီနယ်အကြောင်းကို ဆောင်းပါးတစ်ပုဒ် ပေါင်းရေးကြတယ်။ သူက မဂ္ဂဇင်းတိုက်ကပေးထားတဲ့ ကားနဲ့ တစ်နယ်လုံးပတ်ပြီး လပေါင်းများစွာ ကြာအောင် ဓါတ်ပုံလိုက်ရိုက်နေခဲ့တယ်။ ကျွန်တော်တို့နားက တောအုပ်ကို ရောက်တာနဲ့ သူက ကျွန်တော်တို့ဆီမှာ ညအိပ်လေ့ရှိတယ်။ မဂ္ဂဇင်းတိုက်ကလည်း သူ့ကို စို့စို့ပို့ပို့ပေးထားလေတော့ သူကလည်း သူ့အတွက်ပေးထားတဲ့ ဟိုတယ်ခထဲကနေ ကျွန်တော်တို့ကို ရက်ရက်ရောရော ပေးကမ်းတတ်တယ်။ကျွန်တော်မှတ်မိသလောက်ဆို ပေါင်းကြည့်လိုက်ယင် တစ်ည ဖရန့်ငါးဆယ် လောက်တောင် ရတယ်။

ဒီတော့လည်း အယ်နဲ့ ကျွန်တော်က သူ့ရဲ့ ကိုယ်ပိုင် Inn လေးကို ထိန်းသိမ်းစောင့်ရှောက်တဲ့သူတွေ ဖြစ်လာတယ်။ ပြီးတော့ သူက ခင်မင်စရာ ကောင်းတဲ့သူလည်း ဖြစ်ပြန်တော့ ကျွန်တော်တို့မှာ သူနဲ့တွေ့တိုင်းအမြဲဝမ်းသာမိကြတယ်။ ပြောစရာဆိုလို့ သူဘယ်တော့ ရောက်လာမလဲဆိုတာ ကြိုမသိတာ တမယ်ပဲ။ သူက ဘယ်တော့မှလည်း ကြို ဖုန်းမဆက်ဘူး၊ ပြီးတော့ တစ်ခါလာပြီးယင် အပတ်ပေါင်းများစွာ ပျောက်ချင်ပျောက်နေတတ်တာမျိုး။ ဒီတော့ ကျွန်တော်တို့လည်း မစ္စတာ ရှူးဂါးကို ထည့်မတွက်တော့ဘူး။ သူက ဘယ်က ဘယ်လို ရောက်လာမှန်းမသိ အိမ်ရှေ့မှာ သူ့ရဲ့ ပြောင်လက်နေတဲ့ အပြာရောင်ကားကြီးကို ထိုးရပ်လို့၊ တစ်ည နှစ်ည လောက်နေ  ပြီးယင် ပျောက်သွားပြန်ရော။ သူ တစ်ခါ ထွက်သွားတိုင်း ကျွန်တော်တို့မှာ သူ့ကို နောက်ဘယ်တော့မှ တွေ့ရတော့မှာ မဟုပ်ဘူးလို့ ပဲ ယူဆမိကြတယ်။

ကျွန်တော်တို့အတွက် အဆိုးရွားဆုံး အခိုက်အတန့်ကတော့ ဆောင်းအကုန် နွေအကူးမှာ ရောက်လာခဲ့တယ်။ ချက်လတ်မှတ်ကလည်း ရောက်မလာသေး။ ခွေးတစ်ကောင်ကလည်း အခိုးခံရ၊ ကျွန်တော်တို့မှာ မီးဖိုချောင်ထဲက ရှိသမျှ အစားအစာတွေ အကုန်လုံး ကို တတိတိနဲ့ စားလာလိုက်တာ အဆုံးမှာ ဘာမှကို မကျန်တော့သလောက်ပဲ။ ကျွန်တော်တို့ မရောက်ခင် တစ်ယောက်ယောက် ချန်ထားခဲ့တဲ့ ကြက်သွန်နီ တစ်အိပ်ရယ်၊ ဟင်းချက်ဆီ တစ်ပုလင်းရယ်၊ ပိုင်မုန့်ရဲ့ အကာသားတစ်ထုပ်ရယ်ပဲ ကျန်တော့တယ်။ ပြီးခဲ့တဲ့ နွေထဲက ကျန်တဲ့ဟာတွေဆိုတော့ အောက်သိုးသိုးနံ့တောင် ရနေပြီ။ ကျွန်တော်နဲ့ အယ်လည်း တစ်မနက်လုံးတောင့်ခံလာခဲ့ကြတာ နေ့လည်နေ့ခင်းအထိပဲ၊ ဒါပေမယ့် နှစ်နာရီ ခွဲတော့  ဘယ်လိုမှ မရတော့ ဘူး။ ဒီတော့ ကျွန်တော်တို့ရဲ့ နောက်ဆုံး စားပွဲကို ပြင်ဆင်ဖို့ မီးဖိုချောင်ထဲ ဝင်လိုက်ကြတယ်။ ကျွန်တော်တို့မှာ ချက်စရာ ရှားပါးလိုက်ပုံက ကြက်သွန်ပိုင်မုန့်ပဲ လုပ်စားစရာ ရှိတော့တယ်။ ဖိုထဲမှာ ဟိုလုပ်သည်လုပ်နဲ့ ကျတ်လောက်ပြီထင်တဲ့ အချိန် ကျွန်တော်တို့လည်း ဖိုထဲက ထုပ်၊ စားပွဲပေါ်တင်ပြီး အားပါးတရ စားကြတယ်။

ကျွန်တော်တို့ ထင်ထားသလိုမဟုပ်ပဲ အတော်လေး အရသာ ရှိတာတွေ့ရတယ်။ ကျွန်တော်တို့မှာ တစ်သက်လုံး စားဖူးသမျှ အကောင်းဆုံးပဲ လို့ ပြောမိတော့မလို့ပဲ။ ဒါပေမယ့် ဒါဟာ ကိုယ့်ကိုယ်ကို လှည့်စားမှုတစ်ခုဆိုတာ အသေအချာပါပဲ။ ကျွန်တော်တို့ရဲ့ စိတ်ဓါတ်ကို မြှင့်တင်ဖို့အတွက် မထိရောက်လှတဲ့ အားထုပ်မှု တစ်ခုပါပဲ။ နဲနဲလေး ဆက်ဝါးကြည့်လိုက်တော့ စိတ်ပျက်စရာက စလာခဲ့ပြီ။ ကျွန်တော်တို့မှာ ချီတုံချီချနဲ့ (တကယ့်ကို ချီတုံချီချနဲ့) ပိုင်မုန့်ဟာ အထဲထိ မကျတ်သေးဘူးဆိုတာ မသက်မသာ ဝန်ခံကြရတယ်။ အလယ်ကောင်က စားလို့မရအောင် အေးစက်နေတယ်။ ဘာတတ်နိင်မလဲ၊ မီးဖိုထဲ နောက်ထပ် ဆယ်မိနစ် ဆယ့်ငါးမိနစ် ထားလိုက်ရုံပေါ့။ ဒါပေမယ့် ကျွန်တော်တို့ ဆာလောင်နေပုံနဲ့ စောစောကတင် တံတွေးဂလင်းတွေကို နှိုးဆွလိုက်တာကို ထည့်စဉ်းစားယင် ပိုင်မုန့်ကို ပြန်ထားဖို့ဆိုတာ မလွယ်လှပါဘူး။

ကျွန်တော်တို့လည်း စောင့်နေရတဲ့ ဒုက္ခကို ခံနိင်အောင်၊ အပြင်ထွက်ပြီး လမ်းလေးဘာလေးလျှောက်ယင် မီးဖိုထဲက အနံ့တွေနဲ့ ကင်းဝေးပြီး အချိန်တွေပိုပြီးမသိမသာ ကုန်သွားလိမ့်မယ်လို့တွေးမိတယ်။ ကျွန်တော်မှတ်မိသလောက် ကျွန်တော်တို့ အိမ်ကို တစ်ပတ် ဒါမှမဟုပ် နှစ်ပတ်  ပတ်ကြတယ်။ ကျွန်တော်တို့မှာ တစ်ခုခုအကြောင်း ပြောယင်း နစ်မြောနေတာလည်း ဖြစ်မယ် (ကျွန်တော် မမှတ်မိတော့ဘူး) ဒါပေမယ့် ဘယ်လိုပဲဖြစ်ဖြစ် ကြာသွားလိုက်တာမှ အိမ်ထဲကို နှစ်ယောက်သား ဝင်လိုက်တဲ့ အချိန်မှာ မီးဖိုချောင်တစ်ခုလုံးမီးခိုးတွေနဲ့ ပြည့်နေခဲ့ပြီ။ ကျွန်တော်တို့လည်း မီးဖိုရှိရာ အပြေးသွားပြီး ပိုင်မုန့်ကို ဆွဲထုပ်လိုက်တယ်။ ဒါပေမယ့် သိပ်ကို နောက်ကျ သွားခဲ့ပါပြီ။ ကျွန်တော်တို့ရဲ့ အစားအစာကတော့ စားလို့မရနိင်တော့ဘူး။ မီးဖုတ်လိုက်တာ မီးသွေးခဲလို မည်းမည်း တုံးကြီးဖြစ်တဲ့အထိပဲ၊ တစ်ကိုက်စာလောက်တောင် ပြန်မရတော့ဘူး။

အခုချိန်မှာတော့ ရယ်စရာအဖြစ်အပျက်ပေါ့။ ဒါပေမယ့် အဲဒီ အချိန်ကတော့ လုံးဝ မရယ်နိင်ခဲ့ဘူး။ ကျွန်တော်တို့မှာ တွင်းနက်ကြီးထဲ ကျသွားသလိုပဲ။ ကျွန်တော်တို့နှစ်ယောက်လုံး ဘယ်လိုမှ လွတ်လမ်းကိုစဉ်းစားလို့မရ။ လူတစ်လုံးသူတစ်လုံးဖြစ်အောင် ရုန်းကန်ခဲ့ရတဲ့ နှစ်ကာလတစ်လျှောက်လုံးမှာ မရယ်နိင်လောက်အောင်၊ ပြတ်လုံးမထုပ်နိင်လောက်အောင် ကြုံခဲ့ရတဲ့ အခိုက်အတန့်မျိုး ရှိပါ့မလား ကျွန်တော် သံသယ ဖြစ်မိတယ်။ ဒါကတော့ တကယ့်ကို အဆုံးသတ်ပါပဲ၊ တကယ့်ကို ကြောက်လန့်ဖွယ်ရာခြောက်ခြားဖွယ်ရာ အဆုံးနိဂုံးပါပဲ။

အဲဒီအချိန်က ညနေ လေးနာရီလောက်ပေါ့။ နောက် တစ်နာရီလောက်တောင် မရှိသေး၊ ပျောက်ချက်သား ကောင်းနေတဲ့ မောင်မင်းကြီးသား မစ္စတာ ရှုးဂါး တစ်ယောက် ရုတ်တရက်ကြီး ပေါက်ချလာပါတော့တယ်။ ဖုန်အလိပ်လိပ်နဲ့ ကျောက်စရစ် လမ်းကို တကျွတ်ကျွတ် မောင်းချလာပြီး အိမ်ရှေ့ထိုးရပ်လိုက်တယ်။ ကျွန်တော် မှတ်မိသလောက် သူက ကားထဲက ထွက်ပြီး ဟယ်လိုလို့ ပြောတဲ့ သူ့မျက်နှာမှာ အရိုးခံ အမူအယာလေးနဲ့ အူကြောင်ကြောင် ပြုံးလိုက်တာကို မြင်ယောင်နေတုန်းပဲ။ ဒါဟာ တကယ့် အံ့ဖွယ်ရာ တစ်ခုပါပဲ။ ဒါဟာ တကယ့်ကို ဆန်းကြယ်လှတဲ့ အရာပါ။ ဒါကို ကျွန်တော့်မျက်စိနှစ်လုံးနဲ့ ကို မြင်ခဲ့ရတယ်။ ကျွန်တော့် အသွေးအသားထဲမှာကို ခံစားလိုက်ရတယ်။ အဲဒီ အခိုက်အတန့်ထိ ကျွန်တော့်မှာ ဒီလို အဖြစ်မျိုး တွေကို စာအုပ်ထဲမှာပဲ ရှိတယ် လို့ ထင်ခဲ့မိတယ်။

အဲဒီညက ရှူးဂါးက ကျွန်တော်တို့ကို ကြယ်နှစ်ပွင့်အဆင့်ရှိတဲ့ စားသောက်ဆိုင်မှာ တည်ခင်းဧည့်ခံတယ်။ ကျွန်တော်တို့လည်း အားပါးတရ လွေးကြတယ်။ ဝိုင်တွေ တစ်ပုလင်းပြီး တစ်ပုလင်း ဖောက်ကြတယ်။ အော်ကြီးဟစ်ကျယ် ရယ်ကြတယ်။ ဒီတုန်းက စားခဲ့တာတွေက အရသာ ရှိမှာ သေချာပါတယ်။ ဒါပေမယ့် ကျွန်တော် တစ်ခုမှ မမှတ်မိတော့ဘူး။ ဒါပေမယ့် ကြက်သွန်ပိုင်မုန့်ရဲ့ အရသာ ကို တော့ ကျွန်တော် ဘယ်တော့မှ မေ့လို့မရခဲ့ဘူး။

(ဘာသာပြန်သူ မှတ်ချက်။        ။ ဒီမှတ်စုမှာ အယ်ဟာ ပေါလ်အော်စတာရဲ့ ပထမဇနီး Lidia Davis ပါ)